• Tue. Oct 27th, 2020

壹早分類

Adroo.hk

網上展覽會

Byadroo

Jul 26, 2020

無奈!疫情三爆仲愈爆愈勁,呢幾日每日都過百宗確診,仲要日日都多過尋日咁滯,寫呢篇「編者話」時就已破120宗,而且感染範圍愈嚟愈大、確診群組亦愈嚟愈多,尤其係做嘢或住響疫爆範圍嘅市民,感覺好似唔知幾時會到自己中招咁,情況令人極度擔憂!

更令人擔憂甚至達到氣憤嘅,係響街度居然仲見到有唔肯戴口罩嘅人,咁都不突止,仲有戴住手帶嘅入境者竟然可以周圍走,究竟班人知唔知道家陣發生緊咩事?知唔知道家陣咩環境?真正嘅香港人就被迫stay home抗疫,但就比呢啲咁嘅人出街播毒,仲有響啲確診群組見到班自私精,無視抗疫基本要做嘅嘢,仲到處精彩人生,中招絕對係自己攞嚟,試問咁樣點可以有效控制疫情呢?

以現時情況睇嚟,短期內確診個案只會有增無減,睇住啲係咁颷升嘅確診數字,只想問下有關方面點解當初係都要免檢疫?點解到家陣係都唔肯封關?究竟係邊個令到疫情三爆?點解又無人要負責嘅呢?

由於疫情肆虐,Work From Home再現,加上限時禁堂食令,家陣夜晚十點幾嘅街道,就好似凌晨兩三點咁冷清⋯疫情之下編輯部仍如常運作,但亦有相應措施抗疫,不過解決兩餐就有啲煩,編者以往兩餐都係出街搵食,但由限時禁堂食令嗰日開始,編者一日兩餐都係自取外賣,睇嚟呢個情況都要維持一段日子喇⋯慘!呢啲日子幾時先過呀!?

今個暑假所有展覽叫停,遲下分分鐘連街都唔出得,不過HKTV Mall就預告會響8月搞四個大型網上展覽,分別係「網上書展」、「電子電器節」、「嬰兒用品展」同埋「玩具節」,希望以大量震撼嘅折扣優惠吸引市民,等大家可以唔使出街都買到想要嘅嘢;既然無得去實體展覽,試吓轉行網上展覽都無壞吖,留意各大網上展覽嘅舉行日期喇。